ᐱᓕᕆᐊᕗᑦ
ᓄᓇᕗᑦ ᒥᕐᖑᐃᖅᓯᕐᕕᖏᑦ ᓄᓇᑦᑎᐊᕙᐃᓪᓗ ᓯᕗᒃᑲᖅᑕᐃᕗᖅ ᑲᒪᓪᓗᑎᒃ ᐸᖅᑭᑦᑎᓂᕐᒥᑦ ᓴᖅᑭᔮᖅᑎᑦᑎᓂᕐᒥᓪᓗ ᓄᓇᓂᑦ ᐱᖅᑯᓯᖏᓐᓂᓪᓗ ᓄᓇᖓᓐᓂ ᖃᓄᐃᓘᖅᑎᑦᑎᓂᕐᒥᓪᓗ ᓄᓇᕗᒻᒥ. ᒪᓕᒐᖅᑎᒍᑦ ᐱᓕᕆᐊᖏᑦ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᖓᓐᓄᑦ ᐱᖁᔭᖏᓐᓂ ᐊᓯᖏᓐᓂᓪᓗ ᐱᖃᑕᐅᕙᑦᑐᑎᒃ ᒪᓕᒐᕐᓂᑦ ᓲᕐᓗ ᓄᓇᕗᑦ ᐆᒪᔪᓕᕆᓂᕐᒧᑦ ᐱᖁᔭᖏᓐᓂ, ᐊᒻᒪᓗ ᐊᐅᓪᓚᖃᑦᑕᕐᓂᕐᒧᑦ ᐳᓚᕋᖅᑐᓕᕆᓂᕐᒧᓪᓗ ᐱᖁᔭᖏᓐᓂ. ᐃᖅᑲᓇᐃᔭᕐᕕᒃ ᑲᒪᒋᐊᖃᕐᒥᔪᖅ ᒪᓕᓪᓗᑎᒃ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓᓐᓂ (ᐱᓗᐊᖅᑐᒥᑦ ᒪᓕᒐᕐᒥᑦ 8-ᒥᑦ 9-ᒥᓪᓗ) ᐊᒻᒪᓗ ᐃᓚᒋᔭᐅᖃᑕᐅᓪᓗᑎᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖓᓐᓂ ᐅᑭᐅᖅᑕᖅᑐᒧᑦ ᒥᕐᖑᐃᖅᓯᕐᕕᖓᓐᓄᑦ; ᐊᒻᒪᓗ ᑎᓕᔭᐅᕙᑦᑐᑎᒃ ᓄᓇᕗᑦ ᒐᕙᒪᒃᑯᖏᑦᑕ ᐱᖁᔭᖏᓐᓂ ᓲᕐᓗ ᐃᖅᑲᓇᐃᔭᖃᑎᒌᑦ ᐊᒻᒪᓗ ᐱᓴᓱᐊᑕᑎᓐᓂ.
ᒫᓐᓇᐅᔪᖅ, ᐃᖅᑲᓇᐃᔭᕐᕕᒃ ᐊᓪᓚᕕᖃᖅᑐᖅ ᐃᖃᓗᓐᓂ ᐃᖅᑲᓇᐃᔭᖅᑎᖃᐅᖅᑐᑎᒃ ᐊᑐᓂ ᐱᖓᓱᓂᒃ ᐊᕕᑦᑐᖅᓯᒪᔪᓂᒃ (ᕿᑭᖅᑖᓗᒻᒥ - ᐃᖃᓗᓐᓂ, ᑭᕙᓪᓕᕐᒥ - ᑲᖏᖅᖠᓂᕐᒥ, ᐊᒻᒪᓗ ᕿᑎᕐᒥᐅᓂᑦ - ᖁᓪᓗᖅᑑᒥ) ᑭᒻᒥᕈᒥᓗ. ᐊᐅᓚᑕᐅᓪᓗᑎᒃ ᐊᐅᓚᑦᑎᔨᖓᓐᓄᑦ, ᒥᕐᖑᐃᖅᓯᕐᕕᒻᒥ ᓄᓇᑦᑎᐊᕙᓂᓪᓗ ᑲᒪᖃᑦᑕᖅᑐᒥᑦ, ᐊᖏᔪᖅᑳᕆᔭᐅᓪᓗᓂ ᓄᓇᕗᒻᒥ ᒥᕐᖑᐃᖅᓯᕐᕕᒻᒥ, ᑲᒪᖃᑦᑕᖅᑐᑎᒃ ᐋᖅᑭᑦᑕᐅᒋᐊᓕᓐᓂᑦ, ᐸᕐᓇᑦᑕᐅᒋᐊᓕᓐᓂᒃ ᐊᐅᓚᑦᑎᓂᕐᒥᓪᓗ ᒥᕐᖑᐃᖅᓯᕐᕕᒻᒥ ᓄᓇᑦᑎᐊᕙᓂᓪᓗ, ᐊᓚᓂᖏᓐᓂ ᓴᖅᑭᔮᖅᑎᑦᑎᓂᖏᓐᓂᓪᓗ ᒥᕐᖑᐃᖅᓯᕐᕕᓐᓅᖓᔪᓂᒃ ᐊᒻᒪᓗ ᐳᓚᕋᕐᕕᓐᓂᑦ, ᒪᓕᒋᐊᖃᖅᑐᑎᓪᓗ ᓄᓇᑖᕈᑎᓂᒃ.
ᖃᓪᓕᖅᑕᐅᓯᒪᒻᒥᔫᒐᓗᐊᑦ ᐃᓚᖏᑦ ᐊᑦᑐᐃᓂᖃᖅᑐᑎᓪᓗ, ᒫᓐᓇᐅᔪᖅ ᐱᖓᓲᓕᖅᑲᖓᔪᑦ ᐃᑲᔫᑎᔅᓴᐃᑦ ᒥᕐᖑᐃᖅᓯᕐᕕᓐᓂ ᓄᓇᑦᑎᐊᕙᓂᓪᓗ ᑲᒪᔪᓂᒃ; ᐃᑲᔫᑎᔅᓴᓂᒃ ᐋᖅᑭᔅᓱᐃᓂᕐᒥᑦ; ᒥᕐᖑᐃᖅᓯᕐᕕᒃ ᐊᐅᓚᓂᖓᓐᓂ ᐸᕐᓇᐅᑎᖏᓐᓂᓪᓗ; ᐊᒻᒪᓗ ᓄᓇᑖᕈᑎᐅᔪᓂᒃ ᐊᒻᒪᓗ ᓄᓇᓕᕆᓂᕐᒨᖓᔪᓂᒃ. ᐃᖅᑲᓇᐃᔭᕐᕕᒃ ᐃᑲᔪᖅᑐᐃᒻᒥᔪᖅ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ ᓯᕗᓂᑦᑎᓐᓂ ᐱᐅᓂᖅᓴᐅᖁᓪᓗᒋᑦ, ᑲᒪᔪᓐᓇᕐᓗᑎᓪᓗ ᑎᓴᒪᒋᔭᐅᓂᐊᖅᑐᒥᒃ ᐃᑲᔫᑎᔅᓴᓂᒃ ᒪᑯᓂᖓ; ᑐᑭᒧᐊᖅᑎᑦᑎᓂᕐᒥᑦ ᐱᐅᖅᓱᐊᕈᑎᔅᓴᓂᒃ. ᑕᒪᓐᓇ ᐱᒻᒪᕆᕈᕐᓂᐊᕐᒥᔪᖅ ᓄᓇᕗᒻᒥ ᑲᓇᑕᒥ ᑲᒪᒋᐊᖃᕐᓂᖏᓐᓂ ᓯᓚᕐᔪᐊᒥᓗ ᐱᓕᕆᐊᕆᔭᕆᐊᓕᖏᑦ ᐱᐅᖅᓱᐊᓂᕐᒨᖓᔪᓂᒃ ᐸᕐᓇᐅᑎᖃᕆᐊᖃᕐᓂᖏᓐᓂ, ᐃᒪᕐᓂᑦ ᐸᖅᑭᑦᑎᓂᕐᒥᑦ ᐱᕈᖅᑐᐃᓪᓗ ᐊᔾᔨᐅᓐᖏᓐᓂᖏᓐᓂ.
- ᐃᑲᔫᑎᔅᓴᓂᒃ ᐋᖅᑭᔅᓱᐃᓂᖏᑦ. ᐋᖅᑭᓱᖅᑕᐅᓗᑎᒃ ᓄᓇᕗᒻᒥ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᓄᓪᓗ ᐃᑲᔫᑎᔅᓴᐃᑦ, ᐸᕐᓇᐅᑎᔅᓴᖏᑦ, ᒪᓕᒐᖅᑎᒍᑦ ᐊᑐᐊᒐᖅᑎᒍᓪᓗ; ᑐᓴᐅᒪᖃᑦᑕᐅᑎᓂᖅ ᓴᖅᑭᔮᖅᑎᑦᑎᓂᕐᓗ/ᓂᐅᕐᕈᑎᖃᕋᓱᐊᕐᓂᖅ; ᖃᐅᔨᒃᑲᐃᖃᑦᑕᕐᓂᖅ ᒥᕐᖑᐃᖅᓯᕐᕖᑦ ᖃᓄᖅᑑᕈᓐᓇᕐᓂᖏᑦ, ᐋᖅᑭᔅᓯᒪᓂᖏᑦ, ᐸᕐᓇᐅᑎᖏᑦ ᐊᐅᓚᑦᑎᓂᖏᓪᓗ; ᑐᑭᒧᐊᖅᑎᑦᑎᓗᑎᒃ ᐃᖅᑲᓇᐃᔭᕐᕕᓐᓂᑦ ᖃᐅᔨᓴᖅᑕᐅᒋᐊᖃᖅᑐᓂᒃ;
- ᒥᕐᖑᐃᖅᓯᕐᕕᒻᒥ ᐊᐅᓚᓂᖏᑦ ᐸᕐᓇᐅᑎᖏᓪᓗ. ᐊᐅᑕᐅᓗᑎᒃ ᒥᕐᖑᐃᖅᓯᕐᕖᑦ ᐳᓚᕋᖅᑎᓄᓪᓗ ᐱᔨᑦᑎᕋᕐᕖᑦ ᓱᓇᒃᑯᑖᖏᓪᓗ; ᐋᖅᑮᒻᒥᓗᑎᒃ ᒥᕐᖑᐃᖅᓯᕐᕕᒨᖅᑐᑦ ᐊᑎᓕᐅᖃᑦᑕᕆᐊᖃᕐᓂᖏᓐᓂ ᑐᐊᕕᕐᓇᖅᑐᖃᓕᖅᑲᑦ ᖃᓄᖅ ᑲᒪᒋᐊᖃᕐᒪᖔᑕᓗ; ᑐᑭᒧᐊᖅᑎᑦᑎᓗᑎᒃ ᐊᑭᑐᔫᑎᓄᑦ ᐸᕐᓇᐅᑎᐅᓂᐊᖅᑐᓂᒃ ᒥᕐᖑᐃᓯᖅᕕᒥᓪᓗ ᐸᕐᓇᐅᑎᓂᒃ ᐋᖅᑭᓱᖅᑕᐅᓂᖏᓐᓂᓪᓗ;
- ᓄᓇᑖᕈᑏᑦ ᐊᒻᒪᓗ ᓄᓇᓕᕆᓂᖅ. ᐊᐅᓚᑦᑎᓗᑎᒃ ᐊᑐᓕᖅᑎᑕᐅᓂᖏᓐᓂ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓᓐᓂ, ᐊᐅᓚᑦᑎᓗᑎᒃ ᐊᑐᓕᖅᑎᑕᐅᔪᓂᒃ ᑲᒪᖃᑦᑕᕐᓗᑎᒃ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᐃᓄᓐᓄᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖏᓐᓂ ᒪᓕᑦᑕᐅᒋᐊᓕᓐᓂᒃ; ᐊᒻᒪᓗ ᑐᑭᒧᐊᖅᑎᑦᑎᓗᑎᒃ ᓄᓇᓕᕆᓂᕐᒥᑦ ᑐᓴᕈᑎᔅᓴᓂᒃ ᐊᒻᒪᓗ ᐃᖅᑲᓇᐃᔭᕐᕕᐅᑉ ᓄᓇᖓᓐᓂ ᐊᑐᖅᑕᐅᔪᓐᓇᖅᑐᓂᒃ ᐸᕐᓇᐅᑎᒋᔭᕆᐊᓕᖏᓐᓂ;
- ᐱᐅᖅᓱᐊᕐᓂᖅ. ᑐᑭᒧᐊᖅᑎᑦᑎᓗᑎᒃ ᐱᐅᖅᓱᐊᕐᓂᕐᒥᑦ ᐱᖃᓯᐅᑎᓪᓗᒋᑦ ᐱᐅᖅᓱᐊᖅᑕᐅᒋᐊᓕᓐᓄᑦ ᐸᕐᓇᐅᑏᑦ, ᐱᕈᖅᑐᐃᑦ ᐊᔾᔨᒌᓐᖏᓐᓂᖏᓐᓂ ᐸᕐᓇᐅᑎᖓᓐᓂ, ᐊᓯᖏᓐᓂᓪᓗ ᑲᓇᑕᒥ ᓯᓚᕐᔪᐊᒥᓗ ᑲᒪᒋᔭᐅᒋᐊᖃᖅᑐᓂᒃ.
